ငွေကုန်ကြေးကျ အများကြီးနဲ့ မော်မော်ကြွားကြွား၊ ခမ်းခမ်းနားနား အလှူကြီးပေးပေမဲ့ အကျိုးပေးညံ့ချင် ညံ့နေတတ်တယ်။ အဲဒါ အလှူပေးစဉ် စိတ်ထားမမှန် စေတနာ မထက်သန်ခဲ့လို့ပါပဲ။ တကယ်တော့ ငွေကြေး ၀တ္ထုပစ္စည်းက အဓိက မဟုတ်ပါဘူး။ စေတနာကသာ ကောင်းကျိုးပေးစွမ်းနိုင်ကြောင်း ဒီပုံဝတ္ထုလေးက သက်သေပြနေပါတယ်။ဘုရားရှင် လက်ထက် ရာဇဂြိုလ်ပြည်မှာ ဗိမ္မိသာရမင်းကြီးထံ ပန်းတော်ဆက်သရတဲ့ သုမန ပန်းသည်ဆိုတာ ရှိတယ်။ သုမနဟာ တစ်နေ့လျှင် မြတ်လေးပန်း ရှစ်စလွယ် ဘုရင်ကို ဆက်သရတယ်။ ဘုရင့်ဆီက တစ်နေ့လုပ်အားခ အသပြာ ရှစ်ကျပ်ရတယ်။
တစ်နေ့တော့ ဘုရားရှင်ဟာ ရောင်ခြည်တော်ခြောက်သွယ် တစ်ခဲနက် ကွန့်မြူးပြီး မြိုတော်အတွင်းသို့ ဆွမ်းခံကြွအလာ သုမနကလည်း ဘုရင့်ထံ ပန်းတော်ဆက်ဖို့အလာ တစ်နေရာမှာ ဆုံမိကြပါရော။ သုမနပန်းသည်ဟာ ဘုရားရှင်ကို ဖူးလိုက်ရတယ် ဆိုရင်ပဲ ဘုရားကျေးဇူးတွေ တလှိုက်လှိုက် ကြည့်ညိုလာပြီး ဘုရင့်က ငါ့ကိုသတ်ချင်သတ်၊ ထောင်ချချင်ချ လိုက်ဦး ဘုရင့်ကို ဆက်မယ့် ဒီပန်းတွေကို ဘုရားကို လှူလိုက်တော့မယ်။ ဘုရင်ပေးတဲ့ တစ်နေ့ ရှစ်ကျပ်ဆိုတဲ့ အသပြာဟာ တစ်ဘ၀သာ စားသုံးနိုင်တယ်။ ဘုရားရှင်ရဲ့ ဓမ္မကျေးဇူး၊ စွန့်လွတ်မှုရဲ့ တန်ပြန်အားကတော့ ကမ္ဘာကုန်ပေမဲ့ ကုန်အံ့မထင်...။
အဲဒီလိုခံယူပြီး ဆုံးဖြတ်ပြီး ပန်းနှစ်ဆုပ်ဖြင့် ဘုရားရှင်ရဲ့ အထက်ဆီ ပစ်ကြဲ ပူဇော်လိုက်တယ်။ ပန်းတွေက ပန်းဆိုင်းကြီးတွေဖြစ်ပြီး ဘုရှားရှင် အထက်မှာ မျက်နှာကျက်လို တည်နေတော့သတဲ့။ ကျန်တဲ့ပန်းတွေနဲ့ ၀ဲယာ လှည့်ပတ် ပူဇော်ကြပြန်တော့ ပုဆိုးတင်းထိမ်တွေနဲ့ ကာရံထားသလို (ဘုရားရှင် မျက်နှာတော်ဖူးနိုင်ရုံမျှ အပေါက်ကလေးသာကျန်ပြီး) တည်နေတယ်တဲ့။ ပန်းတွေဟာ မြေမသက်၊ ဘုရားရှင်ကြွတော်မူရင် အတူလိုက်ပါသွားပြီး ဘုရားရှင် ရပ်တော်မူသော် အတူ ရပ်တန့်ကြတယ်။
သုမနဟာ သူလှူတဲ့သူ ပန်းတွေရဲ့ ထူးခြားတဲ့ အခြင်းအရာကိုကြည့်ပြီး ပီတိ ဖြစ်လာလိုက်တာ ရိုးတွင်းခြင်ဆီထဲကတောင် တသိမ့်သိမ့်တက်လာသတဲ့။
မြို့သူမြို့သားတို့လည်း အလှူခံ ပုဂ္ဂိုလ် ဘုရားရှင်ရဲ့ ထူးကဲလွန်မြတ်ခြင်း၊ အလှူပေးသူ သုမနရဲ့ ထူးကဲခြင်း၊ နှစ်ဖက်ဆုံရာက ပေါ်ထွန်းလာတဲ့ ပန်းတို့ရဲ့ တည်နေဟန် အံ့ဖွယ်သရဲ ဖြစ်ပုံကို မြင်တွေ့ကြပြီး ပီတိအဟုန် ဖြစ်ပေါ်လာတယ်။ ဘုရားရှင်ကို လှူဖွယ်အစုံ၊ ပူဇော်ထူးနဲ့ သဒ္ဓါကို အကြောင်းပြုပြီး သဒ္ဓါပေါင်းများစွာ ပွင့်ပေါ်လာတယ်။
သုမန အိမ်ပြန်ရောက်တော့ ဒီအကြောင်း ဇနီးဖြစ်သူ ၀မ်းသာပါစေတော့လို့ ပြန်ပြောပြတယ်။ မိန်းမက ၀မ်းမသာတဲ့အပြင် ဆဲရေးတိုင်းထွာပါလေရော။ ဘုရင်စီးပွား၊ သူ့စီးပွား ထိမယ့် အလှူမျိုးလုပ်ခဲ့လို့တဲ့။ သခင်အားရ အောင် သူက ပဲ ဦးစွာ သံတော်ဦးတင် ကုန်းချောပါလေရော။
ဒါပေမဲ့ ဘုရင် ဗိမ္မိသာရဟာ မကြုံစဖူး ထူးကဲတဲ့ သုမနပန်းသည်ရဲ့ အလှူပေါ်မှာ အံသြလို့ မကုန်၊ ပီတိ အဟုန်လည်း ဖြစ်လျက်က ချက်ချင်း မြှောက်စားလိုက်ပါတယ်။ ဆင်ရှစ်စီး၊ မြင်းရှစ်ကောင်၊ ကျေးကျွန်ယောက်ျား ရှစ်ဦး၊ ကျွန်မိန်းမ ရှစ်ယောက်၊ အကောင်းဆုံးဝတ်စုံ ရှစ်စုံ၊ အသပြာရှစ်ထောင်၊ တန်ဆာအပြည့်အစုံ ဆင်ယင်ပြီးတဲ့ အပျိုတော်ရှစ်ယောက်၊ ရွာကြီးရှစ်ရွာ...စုစုပေါင်း ဆု အမျိုးအစားရှစ်မျိုး ပေးသနား ချီးမြှင့် လိုက်တော့တယ်။
အဲဒါ ချက်ချင်းလက်ငင်း အကျိုးခံစားရတာ။ လက်ငင်းအကျိုးပေး ဘာကြောင့် ရသလဲဆိုတော့ သုမန ပန်းသည်မှာ ငါစွဲ၊ ၀တ္ထုစွဲ၊ ပုဂ္ဂိုလ်စွဲ မရှိဘူး။ ဘုရားဆိုတဲ့ အစွဲထက် ဘုရားရှင်ရဲ့ ဂုဏ်တော် ကျေးဇူးတော်တွေကို အောက်မေ့ကြည်ညိုခဲ့တာ အဓိက ပဓာနကျ ပါတယ်။ ဘယ်သူမှ မတိုက်တွန်းရဘူး ၊ ဘုရားရှင်ကို ဆက်ရမယ့်ပန်းအတွက် ဘုရင်သတ်ချင်သတ်၊ ထောင်ချချင်ချ ဆိုတဲ့ ရဲ့ရင်တဲ့ ထက်သန်တဲ့ စေတနာလည်းရှိတယ်။ အဲဒီ လက်ဦးစေတနာက အကျိုးပေးတာပါ။လှူစဉ်တုန်းက လည်း ရကောင်းစေဆိုတဲ့ လောဘစိတ်၊ မျှော်စိတ် မရှိဘဲ စင်ကြယ်စိတ်နဲက လှူခဲ့တာ ဖြစ်လို့ လက်ငင်းအကျိုးပေးတာပါ။
သုမနပန်းသည် သံသရာမှာ ရရှိမယ့် ဆုကတော့ ၉၁ ကမ္ဘာလုံးလုံးအပါယ်မလားတော့ဘူး။ပစ္စေက ဗုဒ္ဓါ အဖြစ်နဲ့လည်း နိဗ္ဗာန်စံဝင်ရမယ် ဆိုတဲ့ ဆုထူး ဆုမြတ်ကြီးကိုလည်း ရရှိသွားပါတယ်။
ညခင်း
တရားအစစ်-အမှန်ချစ်-နှစ်ခြိုက်ကျင့်သုံးနိုင်ပါစေ။
0 - Comment:
Post a Comment